Tələbələr hansı sahələrdə endirimlərdən yararlanmaq istəyir? | Hansı imtiyazlar veriləcək?

Yeni tədris ilindən etibarən vahid tələbə kartının yaradılması və bakalavr, magistrant və doktorantlara müəyyən güzəştlərin tətbiq olunması planlaşdırılır.

Baku TV-nin keçirdiyi sorğu zamanı aydın olub ki, tələbələrin bəziləri bundan xəbərsiz olsa da, bir çoxu məlumatlıdır.

Bəs onlar daha çox hansı sahələrdə endirimlərdən yararlanmaq istəyirlər?

“Əsas bizim üçün önəmli olan nəqliyyatdır. Nəqliyyatda endirim olsa, kifayətdir”, – tələbə deyib.

Vahid tələbə kartının oktyabrda tələbələrə təqdim edilməsi planlaşdırılır.

Təhsilin İnkişafı Fondunun baş mütəxəssisi Aysel Məhərrəmova bildirib ki, sözügedən kart tələbələr üçün həm debet bank kartı, həm təqaüd, həm də universitetə giriş-çıxış kartı funksiyalarını daşıyacaq:

“Layihənin ilkin mərhələsində Bakı, Sumqayıt, Gəncə, Naxçıvan və Lənkəranda 17 ali təhsil müəssisəsini əhatə etməklə təxminən 170 min tələbə bu sistemə qoşulacaq. Artıq 9 universitetlə memorandum imzalanıb. İrəliləyən mərhələlərdə isə digər universitetlər və texniki peşə məktəblərinin də bu layihədən yararlanması nəzərdə tutulub”.

O qeyd edib ki, tələbə kartı vasitəsilə təhsil alanlar bir sıra imtiyazlardan yararlana biləcəklər:

“Bura supermarketlər, kitab, geyim, aksesuar, parfümeriya mağazaları, kafe, restoran, təhsil mərkəzləri, onlayn platformalar, əyləncə məkanları və s. yerlərdə endirimlər, keşbəklər və promokodlar daxildir. Hazırda siyahımızda 250-dən çox şirkət yer alır”.

Təhsilin İnkişafı Fondundan o da bildirilib ki, ölkəmizdə tətbiqi gözlənilən vahid tələbə kartından bir sıra digər sahələrdə istifadə üçün müvafiq qurumlarla danışıqlar aparılır.