Tısbağalar sualtı “xəritə” tərtib edə bilir? | Araşdırmanın nəticələri üzə çıxdı

Şimali Karolina Universitetindən Kayla Qofortun rəhbərlik etdiyi alimlər qrupu maqnit sahəsinin köməyi ilə dəniz tısbağalarının xəritə tərtib etdiyini üzə çıxarıb.

Məlumat üçün bildirək ki, köçəri heyvanlar – quşlar, qızılbalıqlar da dəniz tısbağaları kimi oriyentasiya üçün Yerin maqnit sahəsindən istifadə edir.

Lakin yeni araşdırmalar göstərib ki, tısbağalar qidalanma və ya yuvaqurma yerləri kimi xüsusi yerlərin maqnit “imzalarını” yadda saxlaya bilir. Bu kəşf heyvanların coğrafi ərazilərin maqnit koordinatlarını öyrənə və yadda saxlaya bildiyinə dair ilk birbaşa sübut olub.

Maraqlıdır ki, tısbağaların xəritə yaratmaq qabiliyyəti onların daxili “maqnit kompası”ndan asılı olmayaraq işləyir və bu, maqnit sahəsini qavramaq üçün iki fərqli sistemin olduğunu göstərir.

Tısbağaların qabiliyyətlərini öyrənmək üçün elm adamları heyvanları Atlantik okeanının maqnit sahəsini təkrarlayan hovuza yerləşdiriblər.

İki ay ərzində tısbağalar maqnit sahəsi müəyyən bir əraziyə – Şimali Amerika sahillərinə və ya Meksika körfəzinə uyğun gələndə qidalanırdı. Onlar qidalanacaqlarını gözlədikləri zaman suda fırlanaraq qanadlarını çırparaq güclü şəkildə üzməyə başlayırlar. Tədqiqatçılar bunu “tısbağa rəqsi” adlandırırlar. Onlar bu yolla yaddaşlarında xəritə tərtib edirlər.

Əsərin müəlliflərinin fikrincə, dəniz tısbağalarının maqnit xəritəçəkmə qabiliyyətinin kəşfi bizim heyvanların naviqasiyası haqqında biliklərimizi genişləndirməklə yanaşı, onların mühafizəsinə də kömək edə bilər.