Turistlərin girə bilmədiyi kənd | "Sevgi ağacı"nın altındakı cütlük nələr danışdı? - KƏNDİNƏ QAYIT

“Kəndinə qayıt” verilişinin yeni buraxılışı yayımlanıb.

Verilişin budəfəki sayında məşhur “Ögey ana” filminin çəkildiyi İsmayıllı rayonunun Qalacıq kəndinə səyahət edilib.

Proqramın aparıcısı Kəmalə Bədəlova İsmayıllının mərkəzindən Qalacıq kəndinə avtostop çəkərək gedib.

İsmayıllı rayonunun şimal-qərb istiqamətində sonuncu yaşayış məntəqəsi olan Qalacıq kəndinin əhalisi 1689 nəfərdir. Kənd şimal-qərbdə, dağın ətəyində yerləşir. Aparıcı Qalacığa gedən yolda “Ögey ana” filminin qəhrəmanı İsmayılın itburnu dərdiyi və partlayışda yer alan qayalığı ziyarət edib. O, həmçinin filmin bəzi epizodlarının çəkildiyi həyətdə də olub.

K.Bədəlova kənd ağsaqqalları ilə həmsöhbət olub, Qalacıq kəndinin problemləri ilə tanış olmağa çalışıb.

Verilişdə son olaraq əsl məhəbbət axtarışında olanların məkanı – “Sevgi ağacı” deyilən yer ziyarət olunub.

Ağacla bağlı iki hekayə var. Birinci versiyaya görə, qovuşa bilməyən iki aşiq həmin yerdən özlərini ataraq birlikdə intihar ediblər. İkinci versiyaya görə isə qovuşa bilməyən iki aşiq intihar etmək üçün həmin məkana gəliblər. Xanım özünü atır, bəy isə fikrini dəyişir. Sonradan o, başqası ilə evlənir və övladına həmin xanımın adını qoyur.