Uşaqların Müdafiəsi Günü şəhid övladları ilə keçirildi

Xaçmaz şəhərindəki Zəfər parkında 1 İyun – Uşaqların Beynəlxalq Müdafiəsi Günü münasibətilə bayram şənliyi təşkil olunub.

Tədbirdə Rayon İcra Hakimiyyətinin başçısı Elnur Rzayev, Milli Məclisin deputatı Sevil Mikayılova, şəhid övladları, ümumtəhsil məktəblərinin şagirdləri, uşaq bağçalarının kollektivləri və azyaşlılar iştirak ediblər.

Şənlikdə məktəblilərin müxtəlif mövzularda çəkdikləri rəsm əsərləri, mədəniyyət müəssisələrinin kitab sərgisi, səhnəciklər və idmançıların nümunəvi çıxışları sakinlər tərəfindən maraqla izlənilib. Xaçmaz Rayon İcra Hakimiyyətinin başçısı Elnur Rzayev uşaqları bayram münasibətilə təbrik edib, onlara xoş arzularını çatdırıb. Ulu öndər Heydər Əliyevin hər zaman uşaqlara xüsusi qayğı, diqqət və məhəbbətlə yanaşdığını, Prezident İlham Əliyev və Birinci vitse-prezident Mehriban Əliyevanın uşaqların savadlı, sağlam və firavan böyüməsi, rifahının yüksəldilməsi məsələlərini dövlət siyasətinin başlıca istiqamətlərindən biri kimi qəbul etdiyini vurğulayıb.

Tədbirdə dərs ili ərzində təhsildə fərqlənən uşaqlar fəxri fərmanla mükafatlandırılıb. Eyni zamanda şəhid övladlarına Xaçmaz Rayon İcra Hakimiyyətinin hədiyyələri təqdim olunub.