Uşaqların üzündə şillə izinə bənzəyən qızartı | Yayılan virusdan necə qorunaq?

Son günlər uşaqlar arasında parvovirusun yayılması müşahidə olunur.

Valideynlərin sözlərinə görə, bu virus əsasən qızartı və qızdırma ilə müşahidə edilir.

Bəs bu xəstəlik necə yayılır və hansı əlamətlərlə özünü göstərir?

Pediatr Bahar Cəbrayılovanın sözlərinə görə, sözügedən virus daha çox 5-15 yaş arası uşaqlar arasında yayılır. Azyaşlı uşaqlarda əsas əlamətlər qızdırma, boğaz ağrısı və qaşıntıdır. Daha böyük uşaqlarda isə oynaq və baş ağrıları müşahidə oluna bilər.

“Yoluxmanın ilk mərhələsində burun axıntısı və qaşıntı yaranır, bir müddət sonra isə uşaqların yanaqlarında şillə izinə bənzər qızartılar meydana çıxır. Müalicəsi simptomatik aparılır, yəni qızdırma salınır, qaşıntı aradan qaldırılır. Adətən bu vəziyyət bir həftə davam edir”, ‒ deyə pediatr əlavə edib.

Uşaqları parvovirusdan qorumaq üçün ən vacib addım təşvişə düşmədən, vaxtında tədbir görməkdir. Bu virus qorxulu deyil, amma gecikmək risklidir.

Əgər uşağınızda bu simptomlara rast gəlirsinizsə, həkimə vaxtında müraciət edin.