Vətəndaşdan etiraz: "Ay ərzində 8 dəfə təcili yardım gəlir" - Baku TV

Gəncə şəhər sakini Vüqar Məmmədov bildirir ki, 2004-cü ildə hərbi xidmətdə olarkən səhhətində ciddi problemlər yaranıb və ona II qrup əlillik dərəcəsi təyin olunub. Vətəndaş əlillik dərəcəsinin aşağı salınmasından və bununla əlaqədar pensiyasının azalmasından narazıdır.

“Hərbi hissədə həkimlər mənə iynə vurub müalicə etdilər və hospitala göndərildim. Sonra tərxis olundum. Evə qayıtdıqdan sonra hospitalın sənədləri əsasında pensiyaya çıxdım və mənə II qrup əlillik təyin olundu. Həmin dərəcə ilə əvvəlcə 2 il, sonra 5 il, daha sonra isə 3 il təqaüd aldım. Lakin sonradan dərəcəmi dəyişərək III qrupa saldılar. İndi də hamı “işlə” deyir. Mən bu səhhətimlə gedib kimin yanında işləyim?!”, – deyə Vüqar Məmmədov narazılığını ifadə edib.

Dövlət Tibbi-Sosial Ekspertiza və Reabilitasiya Agentliyinin şöbə müdiri Tural Qurbanov bildirib ki, Gəncə şəhər sakini 1986-cı il təvəllüdlü Məmmədov Vüqar Ağalar oğlunun əlilliyi həm elektron sistem üzərindən, həm də Dövlət Tibbi Sığorta və Ekspertiza Agentliyinin həkim-ekspertləri tərəfindən əyani baxış zamanı qiymətləndirilib və ona 1 mart 2025-ci il tarixindən hərbi xidmət dövrü ilə əlaqədar orqanizm funksiyalarının 60 % pozulmasına görə 1 il müddətinə əlillik təyinatı aparılıb:

“Vətəndaşın əlillik müddəti başa çatdıqdan sonra tibb müəssisəsi tərəfindən rəsmiləşdirilən yeni göndəriş əsasında növbəti dəfə 25 may 2026-cı il tarixində Agentlikdə əyani müayinə olunub. Vüqar Məmmədovun müayinə nəticələrinə və təqdim etdiyi tibbi sənədlərə əsasən, ona qanunvericiliyə uyğun olaraq təkrar hərbi xidmət dövrü ilə əlaqədar orqanizm funksiyalarının 60 % pozulmasına görə əlillik təyinatı aparılıb və hazırda müvafiq ödənişlərlə təmin olunur”.