Vətəndaşları bəhanələrlə aldadırlar... | Ölümlə üz-üzə qalan sakinlər nədən narazıdır?

Paytaxtda Fətəli Xan Xoyski, 128 ünvanında yerləşən yataqxananın sakinləri binada söküntü işləri aparan MTK-dan şikayətçidirlər.

Vətəndaşlar bildiriblər ki, şirkət onlarla razılaşmır və sakinlər öz evlərində olduğu halda MTK binadakı söküntü işlərini davam etdirir. Bu da sakinlərin həyatına təhlükə yaradır.

“Vətəndaşları müxtəlif bəhanələrlə aldadırlar. Camaata pul vermək istəmirlər. Çox əziyyət çəkirəm, haqqımı versinlər, çıxım gedib”, – deyə sakinlər narazılıqlarını bildiriblər.

MTK-nın icraçı direktoru Nurlan Məmmədov isə bildirib ki, 5 aydır sözügedən binalar qəzalı olduğuna görə istismarı dayandırılıb:

“On səkkiz kvadratmetr hər bir sakinə düşən paydır. Biz onlara 35 kvadratmetr təklif etdik. Şirkət yeni təmir olunmuş binalarda vətəndaşlara kirayə mənzillər təqdim etdi. Altı məcburi köçkün və iki sakin isə bizim təklifimizlə razılaşmadı. Biz yenə də onlarla görüş edəcəyik”.

Məsələ ilə bağlı Qaçqınların və Məcburi Köçkünlərin İşləri üzrə Dövlət Komitəsindən bildirilib ki, həmin yataqxanada 15-dən çox məcburi köçkün ailəsi müvəqqəti məskunlaşıb.

Yataqxananın qəzalı vəziyyətdə olması səbəbindən 12 ailə bir müddət əvvəl qurum tərəfindən Məcburi Köçkünlərin Müvəqqəti Yerləşdirilməsi Fonduna məxsus mənzillərə köçürülüb. Hazırda yataqxanada qalan üç ailəyə mənzillər təklif edilib. Həmin mənzillərə köçməyə razılıq verdikləri halda onların köçürülməsi Dövlət Komitəsi tərəfindən təmin ediləcək.