Xalq artisti Arif Babayev 87 yaşında dünyasını dəyişdi

Arif Babayev 1938-ci il fevral 20-si Ağdam şəhəri yaxınlığındakı Sarıhacılı kəndində anadan olub.

Xanəndə Seyid Şuşinski, Xan Şuşinski, Zülfi Adıgözəlov kimi sənətkarların ənənələrinə əsaslanaraq, özünəməxsus ifaçılıq üslubu yaradıb.

Onun yaradıcılığında “Şur”, “Seygah” muğam dəstgahları, “Arazbarı”, “Qarabağ şikəstəsi” zərbi muğamları xüsusi yer tutur. Xanəndə həm də təsnif və xalq mahnılarının ifaçısı kimi böyük şöhrət qazanıb.

Muğam, mahnı, təsnif ifaçısı kimi Arif Babayev klassik xənəndəlik sənətimizin ən layiqli davamçılarından biri olub.

Xanəndə həmişə ürəyinə yatan xalq mahnılarını seçərək ifa edib. “Yar bizə qonaq gələcək”, “Apardı sellər Saranı”, “Yaxan düymələ”, “Qəmərim” kimi mahnılar onun ifasında daha şux, daha oynaq, daha yaddaqalandır.

Arif Babayev Fransa, İsveçrə, İtaliya, Danimarka, ABŞ, Türkiyə, İran, Livan kimi dünyanın bir sıra ölkələrində milli musiqimizi layiqincə təbliğ edib.

Dövlətimiz tərəfindən muğam sənətimizin inkişafındakı xidmətlərinə görə xanəndənin yaradıcılığı həmişə yüksək qiymətləndirilib. Muğam sənətimizin qocaman ustadı Arif Babayev “Şöhrət”, “İstiqlal”, “Şərəf” ordenlərinə, Heydər Əliyev Mükafatına layiq görülüb.

Xanəndə 87 yaşında dünyasını dəyişib.