Xarici dil öyrənmək istəyənlərin nəzərinə | Keyfiyyətli kursu necə seçək?

İnsanlar dil kurslarına müraciət edərkən əsas məsələni unudurlar.

Müəllimin sertifikatlarının olub-olmadığını bilməyən tələbənin kursun keyfiyyətindən narazı qalması da təbiidir. Çünki sertifikatsız müəllimin peşəkarlığı sual altındadır.

Maraqlıdır, bəs kurslara işə qəbul edilən müəllimlər üçün hansı meyarlar əsas götürülür?

Dünya təcrübəsi göstərir ki, ali təhsil müəssisələrində, eləcə də kurslarda dil öyrədən müəllimlərin beynəlxalq sertifikatlarının olması mütləqdir.

Təhsil eksperti Kamran Əsədov bildirib ki, istər hazırlıq kurslarında, istər ali məktəblərdə kimsə bu və ya digər dillərin tədrisi ilə məşğuldursa, onlar bununla bağlı beynəlxalq sertifikat almalıdırlar:

“Etiraf edək ki, yerli imtahanlarda kənar müdaxilələr olur, bilik və bacarıqlar o qədər də keyfiyyətli yoxlanıla bilmir. Xarici universitetlər qəbul zamanı tədrisin müxtəlif dillərdə aparıldığı bölmələrə tələbələrdən IELTS, “Duolingo” kimi imtahan nəticələri tələb edir. Bu, Azərbaycanda da müəllimlərin işə qəbulu zamanı tətbiq olunmalıdır”.

Müşahidələr nəticəsində belə qənaətə gəlmək olur ki, müəllimlərin işə qəbulu zamanı əksər dil kurslarında sertifikatlar tələb olunmur. Ona görə də dil öyrənmək istəyən şəxs mütəxəssis seçərkən mütləq diqqətli olmalıdır.