Yanğın-xilasetmə sahəsində əməkdaşlıq müzakirə olundu

Bakıda Yanğınsöndürənlərin və Xilasedicilərin Beynəlxalq İdman Federasiyasına üzv ölkələrin rəhbərlərini bir araya gətirən 26-cı Beynəlxalq Konfrans keçirilib.

Dünyanın 20-dən çox ölkəsindən 100-dən artıq nümayəndəni bir araya gətirən tədbir yanğın-xilasetmə sahəsində beynəlxalq əməkdaşlığın genişləndirilməsinə həsr olunub.

Qazaxıstan fövqəladə hallar nazirinin müavini Ramil Kamalov bildirib ki, Yanğınsöndürənlərin və Xilasedicilərin Beynəlxalq İdman Federasiyası bugün dünyanın 20 ölkəsini birləşdirir. 16 ölkənin kişilərdən ibarət, 6 ölkənin isə qadınlardan ibarət komandaları aktiv iştirak edirlər:

“Konfransın keçirilməsində əsas məqsəd Ər-Riyadda baş tutan sonuncu çempionatın hesabatının aparılmasıdır”.

Qeyd edək ki, Azərbaycan Fövqəladə Hallar Nazirliyinin təşkilatçılığı ilə keçirilən və dekabrın 6-na kimi davam edəcək konfransın gündəliyinə yanğın-xilasetmə idmanının inkişafı, bu idman növü üzrə keçirilmiş son dünya çempionatının təhlili, habelə 2026-cı ildə yanğın-xilasetmə idmanı üzrə dünya çempionatlarının təşkili və beynəlxalq əməkdaşlıq məsələlərinin müzakirəsi daxildir.