“Yaxşı edib ədəbsiz danışıram” | Taksi sürücüsü və sərnişin arasında dava - Baku TV

Sosial şəbəkələrdə taksi sürücüsü ilə sərnişin arasında baş verən mübahisənin görüntüləri yayılıb. Dialoq qısa zamanda geniş müzakirələrə səbəb olub.

Videoda qadın sərnişinin sürücüdən avtomobildə internetdən istifadə etmək üçün “Wi-Fi” bağlantısı istədiyi, sürücünün isə buna razılıq vermədiyi görünür. Tərəflər arasında yaranan mübahisə zamanı qarşılıqlı sərt ifadələr səslənib.

Məsələ ilə bağlı danışan taksi sürücüsü bildirib ki, sərnişin internetdən istifadə etmək istəyini xahiş formasında deyil, tələb kimi çatdırıb. Onun sözlərinə görə, “Wi-Fi” bağlantısını paylaşmamaq qərarı şəxsi seçimidir və bu, xidmət şərtlərinə daxil deyil.

Sürücü qeyd edib ki, sərnişini yolda düşürməyib və onun tələbi ilə ünvana geri qaytarıb.

Paytaxt sakinlərinin məsələyə münasibəti fərqli olub. Bəzi şəxslər müasir dövrdə bu kimi xidmətlərin vacib olduğunu desə də, digərləri sürücünün şəxsi internetini paylaşmaq məcburiyyətində olmadığını vurğulayıb.

Nəqliyyat üzrə ekspert Aslan Əsədov da məsələyə münasibət bildirib. O qeyd edib ki, avtomobildə internetin təqdim edilməsi sürücünün və ya şirkətin məcburi öhdəliyi deyil. Ekspertin sözlərinə görə, “Wi-Fi” kodunun paylaşılması yalnız sürücünün istəyindən asılıdır.