Yeni dələduzluq növü ortalığa çıxdı | Ehtiyatlı olun!

Yeni, çox təhlükəli və qorxunc dələduzluq növü yayılıb.

Artıq Azərbaycanda qurbanlar da var. Belə ki, səsiniz klonlanır, evdə olan valideyn sanki övladı və ya nəvəsi ilə danışırmış kimi təəssürat yaranır. Növbəti mərhələdə “oğul” valideyninə özünün gələ bilmədiyini və pul üçün adam göndərəcəyini deyir. Valideyn isə buna inanır və pulu kuryerə verir.

İT mütəxəssisi Fərid Pərdəşünas bildirib ki, sözügedən mexanizm birbaşa xaricdən idarə olunur:

“Vəsaitlər xaricə çıxarılır, bütün zənglər başqa ölkələrdən gəlir. Ona görə də valideynlər diqqətli olmalı, mütləq dəqiqləşdirməli, oğluna yenidən zəng etməli, özləri hadisə yerinə getməlidirlər. Tanımadığı adama pul təqdim etməməlidir. Eyni zamanda da kuryer kimi fəaliyyət göstərən şəxslər diqqətli olmalıdırlar. Hansı pulu, niyə daşıdıqlarını və xaricə nə üçün göndərildiyini sorğulamalıdırlar”.

Əksər vətəndaşlar bu dələduzluq növündən xəbərsiz olsalar da, məlumatı olanlar da var. Artıq bu yeni dələduzluq növündə kuryer kimi fəaliyyət göstərən 20 nəfər şəxs saxlanılıb.

Odur ki, kiberdələduzların qurbanı olmaq istəmirsinizsə, daxil olan zənglər üzrə verilən məlumatları dəqiqləşdirin, tanımadığınız şəxslərə qəti şəkildə pul vəsaiti verməyin. Ən önəmlisi isə bununla bağlı övladlarınızı mütləq məlumatlandırın.