Yeni qayda avtomobillərin icbari sığortasında artım yaratdı
2023-cü ilin yanvar-iyul aylarında Azərbaycanda avtomobillərin icbari sığortası üzrə 93 milyon manata yaxın vəsait ödənilib.
Mərkəzi Bankın məlumatına görə, bu göstərici 2022-ci ilin eyni dövrü ilə müqayisədə 57 faizə yaxın çoxdur. Artıma səbəb 2022-ci ilin oktyabrından avtonəqliyyat vasitəsi sahiblərinin mülki məsuliyyətinin icbari sığortası haqqının yeni qayda əsasında hesablanmasıdır.
Toplanmış sığorta haqları şirkətlərin qəzalara görə ödədikləri vəsaitdən daha çox artıb. Belə ki, 2023-cü ilin yanvar-iyul aylarında qəzalara görə 57 milyon manata yaxın ödəniş olunub ki, bu da 2022-ci ilin müvafiq dövrü ilə müqayisədə 11 faiz çoxdur.
Bununla da sığorta şirkətləri 2022-ci ilin ilk 7 ayında topladıqları hər 100 manatın 86 manatını qəzalar üçün ödəmişdilərsə, 2023-cü ilin həmin dövründə bu rəqəm 61 manata enib.
![icon](/images/loading.png)