“Yenidən onların üzərində dəfn edilib” | Goranboydakı nekropolda nələr üzə çıxdı? - Baku TV

Fərqli formalı qablar, insan skeletləri, rəngarəng qolbaqlar, muncuqlar və digər qədim əşyalara aid tapıntılar Goranboy rayonunun Tatarlı kəndi ərazisində yerləşən Muncuqlutəpə nekropolunda aşkarlanıb.

Tarixi məkanın eramızdan əvvəl XI-VIII əsrə aid olduğu bildirilir. Nekropolda arxeoloji tədqiqatlara 2007-ci ildən başlanılıb.

AMEA-nın Arxeologiya və Antropologiya İnstitutunun şöbə müdiri Müzəffər Hüseynovun sözlərinə görə, Muncuqlutəpə nekropolu Azərbaycanda bu dövrə aid ən zəngin qəbir abidələrindən biridir:

“Nekropolun təxminən 3100 il yaşı var. Hazırda 42 və 48 nömrəli qəbirlərdə tədqiqat işləri aparırıq. Ümumilikdə 2026-cı il ərzində yeddi qəbirdə arxeoloji qazıntılar həyata keçirmişik. Sahəsi bir hektardan artıq olan nekropolda apardığımız ilkin hesablamalara əsasən, mindən çox qəbir mövcuddur. Burada təxminən 300 il ərzində dəfn mərasimləri həyata keçirilib.

Nekropolda qoşa dəfnlərə, oturaq vəziyyətdə dəfnlərə, eləcə də əvvəlki məzarların üzərində sonrakı dövrlərdə yenidən aparılmış dəfnlərə rast gəlinir.

Burada ən çox aşkarlanan tapıntılar muncuqlardır. Vaxtilə ərazidə çoxlu sayda muncuğun tapılması da bu tarixi məkanın Muncuqlutəpə adlandırılmasına səbəb olub”.