Yoko Şiraişi: Bakıdakı binaların hamısını birdən sökmək mümkün deyil

Azərbaycan Yaponiyanın zəlzələyə davamlı binaların inşasında qazandığı təcrübəsini öyrənir.

Bu məqsədlə həmin ölkənin mütəxəssisləri Bakıya dəvət olunub. Yaponiyalı mütəxəssislərin fikrincə, Azərbaycanda binaların zəlzələyə davamlı olub-olmadığını öyrənmək üçün araşdırma aparılmalıdır.

“Əsas məsələlərdən biri də binaların tikilmə sıxlığıdır. Azərbaycan seysmik əraziyə yaxın bölgə olduğu üçün tikinti başlamazdan əvvəl tam araşdırma aparılmalıdır, tikintinin aparılacağı yer tədqiq edilməlidir. Bakıda olan binaların hamısını birdən sökmək mümkün deyil. Sökülməsi vacib olmayan binaların isə xaricdən və zirzəmidən yenidən davamlılığını artırmaq mümkündür”, – Yoko Şiraişi bildirib.

Yaponiyalı mütəxəssisin fikrincə, Bakıda güclü zəlzələ ola bilər. Məhz buna görə də binaların tikintisində davamlılığa xüsusi diqqət yetirilməlidir.

Qeyd edək ki, yaponiyalı mütəxəssislər Bakıdakı bəzi inşaat şirkətlərinə treninqlər də keçib.