Yüksəliş müsabiqəsinə maraq artıb

Texnologiyanın davamlı inkişafı və əlçatanlığı növbəti illər ərzində iş yerlərində tələb olunan bacarıqların dəyişməsinə gətirib çıxaracaq. Dünya İqtisadi Forumunun qənaətinə görə, 2025-ci ilə qədər bütün işçilərin 50%-nin yenidən ixtisaslaşmaya ehtiyacı yaranacaq. Həmçinin son illərdə aktiv öyrənmə, stresə davamlılıq və çeviklik kimi bacarıq sahiblərinə də tələbat artır. Bu da Azərbaycanda “Yüksəliş” müsabiqəsinin rolunu ortaya qoyur.

Prezident İlham Əliyevin 26 iyul 2019-cu il tarixli fərmanı ilə təsis edilən “Yüksəliş” müsabiqəsi şəffaf seçim mexanizmi vasitəsilə yüksək intellektə və idarəetmə qabiliyyətinə malik perspektivli şəxsləri müəyyənləşdirir, onlara dəstək verir, həmçinin müasir idarəetmədə yeni yanaşmaları üzə çıxarır.

Bu günədək iki dəfə keçirilən müsabiqədə təxminən 24 min iştirakçı arasından ümumilikdə 49 nəfər qalib müəyyənləşib, eləcə də çoxlu istedadlı kadrları üzə çıxarmaq mümkün olub.