Zakir Həsənov orduya tapşırıq verdi

2023-cü ilin hazırlıq planına əsasən, Ordumuzun Əməliyyat, motoatıcı, mexanikləşdirilmiş bölmələrinin komandirləri və onların müavinləri ilə keçirilən təlim-metodiki toplanış başa çatıb. Müdafiə naziri general-polkovnik Zakir Həsənov toplanışın gedişatını müsbət qiymətləndirib və şəxsi heyət qarşısında çıxış edib.

Müdafiə naziri Silahlı Qüvvələrin Ali Baş Komandanı, Prezident İlham Əliyevin Qarabağ iqtisadi zonasında təhlükəsizliyin təmin edilməsi ilə bağlı çıxışlarından irəli gələn, Ordumuzun qarşısında duran tapşırıqların qısa zamanda yerinə yetirilməsinin zəruriliyini qeyd edib.

Zakir Həsənov onu da bildirib ki, ölkənin müdafiə qabiliyyətinin gücləndirilməsi və milli təhlükəsizlik tədbirlərinin daha da artırılması üçün 1 milyard 105 milyon manat, o cümlədən xüsusi müdafiə təyinatlı layihələr və tədbirlər üzrə xərclər üçün 1 milyard manat əlavə edilməsi yeni müasir silah və hərbi texnikanın alınmasına imkan verəcək.

Toplanışda həmçinin Azərbaycan-Ermənistan şərti sərhədi və Qarabağ iqtisadi rayonundakı əməliyyat şəraiti təhlil edilib. Son vaxtlar Rusiya sülhməramlı kontingentinin müvəqqəti yerləşdiyi ərazilərimizdəki qeyri-qanuni erməni silahlı dəstələrinin hərbi daşımaları həyata keçirməsi, bölmələrimizin mövqelərinin qarşısında uzunmüddətli fortifikasiya qurğularını quraşdırmağa cəhd göstərməsi, eləcə də Ağdam, Tərtər və digər rayonlar istiqamətlərində Ordumuzun mövqelərini atəşə tutması nəticəsində yarana biləcək gərginlik xüsusi vurğulanıb.

Müdafiə naziri qeyri-qanuni erməni silahlı birləşmələrinin fəaliyyətlərinin fasiləsiz müşahidəsinin bundan sonra da davam etdirilməsi, eləcə də törədilə biləcək istənilən təxribatın qarşısının dərhal və qətiyyətlə alınmasına daim hazır olmaq barədə konkret tapşırıqlar verib.