Zakir Həsənov xidməti müşavirə keçirdi

Müdafiə Nazirliyində keçirilən növbəti xidməti müşavirədə ölkəmizə qarşı yönələn təhdidlərə toxunulub.

Ordumuzun uğurlu əməliyyatlarını həzm edə bilməyənlərin səsləndirdiyi fikirləri şərh edən müdafiə naziri general-polkovnik Zakir Həsənov heç kəsin bizimlə təhdid dilində danışa bilməyəcəyini vurğulayıb. O, terrorizmi və işğalçılıq siyasətini dəstəkləyən bəzi ölkələrin hərbçilərinin şər-böhtan xarakterli ittihamlarının qəbuledilməz və cəfəngiyat olduğunu bildirib.

Müdafiə naziri Azərbaycan-Ermənistan şərti dövlət sərhədində və Qarabağ iqtisadi rayonunda mövcud əməliyyat şəraitini təhlil edərək, ehtimal olunan təxribatların qarşısının bundan sonra da qətiyyətlə alınması barədə göstərişlər verib.

Z.Həsənov qeyd edib ki, qarşı tərəfin, o cümlədən qeyri-qanuni erməni silahlı birləşmələrinin bütün qanunsuz fəaliyyətləri fasiləsiz nəzarətdə saxlanılmalı və Azərbaycan ərazilərində gələcəkdə bu kimi addımların atılmasına imkan verilməməlidir.

Müşavirədə həmçinin azad edilən ərazilərdə, eyni zamanda yeni nəzarətə götürülən yüksəklik və mövqelərimizdə mühəndis təminatı tədbirlərinin daha keyfiyyətli yerinə yetirilməsi barədə konkret tapşırıqlar verilib.