Zakir Həsənov yaralı hərbçiləri ziyarət etdi

Müdafiə naziri Zakir Həsənov və Ordumuzun digər rəhbər heyəti Novruz bayramı münasibətilə Nazirliyin Baş Klinik Hospitalını ziyarət edib.

General-polkovnik martın 5-də Xankəndi-Xəlfəli-Turşsu torpaq yolunda qeyri-qanuni erməni birləşmələrinin törətdikləri təxribat nəticəsində yaralanan, eləcə də hospitalda müalicə olunan digər hərbi qulluqçularla görüşərək onların səhhəti və reabilitasiya prosesi ilə maraqlanıb.

Prezident, Silahlı Qüvvələrin Ali Baş Komandanı İlham Əliyevin Novruz bayramı təbriklərini hərbi qulluqçu və tibb personalına çatdıran müdafiə naziri onlara bayram sovqatları təqdim edib.

Z.Həsənov Türkiyədə baş verən zəlzələdə xəsarət alanlara tibbi yardım göstərilməsi məqsədilə Ali Baş Komandanın göstərişinə əsasən qardaş ölkəyə ezam olunan hərbi tibb personalı və hospitalın digər əməkdaşları ilə də görüşüb. Yüksək peşəkarlıqlarına görə onlara təşəkkürünü bildirib.

O, tibb işçilərini bayram münasibətilə təbrik edib, müayinə və müalicə olunan hərbi qulluqçulara göstərilən xidmətin daha keyfiyyətli təşkili və təkmilləşdirilməsi ilə bağlı əlavə tapşırıqlar verib.