Zaqatalada baş verən hadisə ilə bağlı qurumdan açıqlama

Mayın 20-dən 21-nə keçən gecə Zaqatala ərazisinə yağan leysan yağışları nəticəsində rayonun Üçüncü Tala kəndində bütün evlərin həyətyanı sahələrinə, zirzəmilərə sel suları dolub.

Sakinlər yağan güclü yağışın kənd təsərrüfatına ciddi ziyan vurduğunu bildiriblər.

“Yetmiş qram qurd götürmüşdük. Bu qədər əziyyət çəkdik, axırı da belə oldu. On gün qalmışdı barama sarımağa, o da məhv oldu getdi. Gecə saat 3-də oyanıb gördük ki, bütün hər tərəf suyun içində qalıb. Üç min manata yaxın ziyan dəyib”, – kənd sakini söyləyib.

Sel suları kənd məktəbinin və uşaq bağçasının da həyətinə dolub. Nəticədə hər iki müəssisə fəaliyyətini birgünlük dayandırıb.

Qeyd edək ki, güclü yağışlar Üçüncü Tala ilə yanaşı, rayonun digər kəndlərinə də ziyan vurub.