Zibil içində yaşamağa məcbur qalan sakinlərin etirazı | Kürdəxanıdan acınacaqlı görüntülər

Bakının Sabunçu rayonu, Kürdəxanı qəsəbəsi, Dadaş Vasif küçəsində göl suyunun səviyyəsi qalxdığına görə həyətləri su basıb.

Sakinlər bildiriblər ki, məsələ ilə bağlı İcra Hakimiyyətinə, bələdiyyə və “Azərsu”ya şikayət edilsə də, baxan olmayıb:

“Suyun içində yaşayırıq. Bir aydır vəziyyət belədir. Kanalizasiya, yağış, qar suyu, hamısı bura axıdılır. Gölün suyu əvvəllər dənizə axıdılırdı, indi dənizə axıdılan hissəsini bağlayıblar. Suyun əlindən heç bir yerə keçə bilmirik. Evlərimizin altı, zirzəmilər su ilə dolub. Yağış yağanda hər tərəf palçıq olur”.

Məsələ ilə bağlı “Azərsu”dan bildirilib ki, həmin ərazidə kanalizasiya infrastrukturu yoxdur:

“Sözügedən ərazidə həm qrunt, həm də tullantı suları birbaşa Xəzər dənizinə axıdılırdı. Ekologiya Nazirliyinin tapşırığına əsasən, tədbirlər görüldü. Pirşağı təmizləyici qurğuları hazırdır. Artıq bu istiqamətdə suyun bir qismi Pirşağı təmizləyici qurğularına yönəldilib və orada təmizlənərək kənarlaşdırılır.

Gələcəkdə bütün ərazinin əhatə edilməsi ilə bağlı kollektorlar və şəbəkənin yaradılması işləri həyata keçirilir. Bu işlər yekunlaşandan sonra ərazidəki subasma hallarının qarşısı alınacaq”.