10 milyondan çox insan yaşayışını itirib | ÜST-dən təcili çağırış

Sudanda ötən ilin aprelindən davam edən münaqişə 20 mindən çox insanın ölümünə səbəb olub.

Bu barədə Ümumdünya Səhiyyə Təşkilatının Baş direktoru Tedros Qebreyesus məlumat verib.

O, dərhal atəşkəsə və humanitar tədbirlərə beynəlxalq maliyyə dəstəyinin artırılmasına çağırıb.

Baş direktor xatırladıb ki, münaqişə səbəbindən Sudanda 10 milyondan çox insan ölkə daxilində evlərini tərk etmək məcburiyyətində qalıb, daha iki milyon insan isə qonşu ölkələrə qaçmağa məcbur olub.

“Fövqəladə vəziyyətin miqyası, eləcə də münaqişənin qarşısını almaq və onun gətirdiyi əzablara cavab vermək üçün görülən tədbirlərin qeyri-adekvatlığı sarsıdıcıdır”, – deyə təşkilat rəhbəri bildirib.

O qeyd edib ki, ölkə əhalisinin yarıdan çoxu – təxminən 25 milyon sudanlı hazırda dəstəyə ehtiyac duyur.

“Biz dünyanı oyanmağa və Sudana yaşadığı kabusdan çıxmağa kömək etməyə çağırırıq”, – deyə T.Qebreyesus vurğulayıb.

Qeyd edək ki, Sudanda vəziyyət 2023-cü ilin aprelində ölkənin Suveren Şurasının sədri ilə ordu komandiri və Çevik Reaksiya Qüvvələrinin rəhbərləri arasında fikir ayrılığı səbəbindən gərginləşib. Onların arasında əsas ziddiyyətlər vahid silahlı qüvvələrin formalaşdırılmasının vaxtı və üsulları ilə bağlıdır.