2 nüvə dövləti arasında gərginlik pik həddə | Pakistanlılar Hindistanı tərk edir

Cəmmu və Kəşmirdəki terror aktından sonra Yeni Dehlinin vizaları ləğv etmək qərarı ilə əlaqədar Hindistanı tərk etməli olan Pakistan vətəndaşlarının demək olar ki, hamısı ölkədən çıxıb.

TASS agentliyi xəbər verir ki, bu barədə “Hindu” qəzeti yazıb.

Daxili İşlər Nazirliyinin məlumatına görə, aprelin 24-dən etibarən 537 Pakistan vətəndaşı Hindistanın Pəncab ştatındakı Atari nəzarət-buraxılış məntəqəsi vasitəsilə ölkəni tərk edib.

Hindistan Xarici İşlər Nazirliyi aprelin 24-də Pakistan vətəndaşlarına vizaların verilməsinin dərhal dayandırılması və əvvəllər verilmiş sənədlərin aprelin 27-dən etibarən ləğv edilməsi barədə qərar qəbul etdiyini elan edib. Pakistan vətəndaşlarına verilmiş tibbi vizalar isə yalnız aprelin 29-dək etibarlı olacaq.

Yeni Dehli bu tədbirləri Cəmmu və Kəşmir ərazisində 26 nəfərin həlak olduğu terror aktından sonra qəbul edib. Hazırda isə bütün dünyanın diqqəti bu coğrafiyadadır. Çünki XX əsrdə 3 dəfə Kəşmir savaşı yaşanıb və budəfəki gərginlik vaxtında yatırılmasa, nüvə müharibəsinə çevrilə bilər.