20 yaşlı ukraynalı model tək getdiyi hoteldə yoxa çıxdı | Sensasiyalı məlumatlar

20 yaşlı ukraynalı model Mariya Kovalçukun Dubayda küçədə huşsuz vəziyyətdə tapılması dünya gündəmini zəbt edib.

Qız bir neçə gün əvvəl ağır halda tapılıb. Onun ayaqları, qolları və onurğası sınıb. Hazırda xəstəxanada olan model danışa bilmir.

Anasının və rəfiqəsinin sözlərinə görə, bir gün əvvəl qız naməlum kişiləri görmək üçün hotelə tək gedib, bundan sonra ailəsi onunla heç bir əlaqə qura bilməyib. İddialara görə o, şeyxlərin əyləncə partisinə qatılıb.

Birləşmiş Ərəb Əmirliklərinin hüquq-mühafizə orqanları məsələ ilə bağlı rəsmi məlumat yayıb. Bildirilib ki, Mariya qapalı tikinti sahəsinin damından yıxılıb. O, martın 19-da yox, 12-də, yəni itkin düşdüyü gün tapılıb.

Kovalçukun tikinti sahəsinə özbaşına girdiyi deyilib: “Hadisənin martın 12-də baş verdiyini təsdiqləyə bilərik. Hadisə yerində olan şahidlər dərhal təcili yardım çağırıb, zərərçəkmiş xəstəxanaya aparılıb və o, həkim nəzarətindədir”.

Polis istintaqın hələ də davam etdiyini deyib.