2200-cü ilədək heyvanlar aləmində nələr baş verəcək? | Alimlərdən maraqlı araşdırma

Yeni Zelandiyalı alimlər müəyyən ediblər ki, 2200-cü ilə qədər quruda yaşayan sürünənlər nəhəng ölçülərə çatacaq. Hətta bəzi növlərin çəkisi 100 kiloqramı keçə bilər.

Buna misal olaraq, iquan kimi kiçik növlər belə iri itlər ölçüsünə qədər böyüyə bilər.

Alimlərin sözlərinə görə, bu "sıçrayışın" səbəbi təkamül dəyişiklikləridir. Hazırda əksər sürünənlərin təbii düşmənləri yoxdur, yəni onların getdikcə iriləşməsinə heç nə mane olmur.

Dinozavrlar dövründə sürünənlər daha kiçik idi, bir çoxu adi kərtənkələlərdən ölçüsünə görə fərqlənmirdi. Lakin milyon illər ərzində onların ölçüləri əhəmiyyətli dərəcədə artıb.

"Sürünənlər dinozavrlar dövründən bəri sabit şəkildə böyüyür ‒ kiçik kərtənkələlərdən müasir timsah və tısbağalara qədər", ‒ deyə tədqiqatçılar qeyd ediblər.

Bu faktı paleontoloji tapıntılar təsdiqləyir. Müasir timsah və tısbağaların əcdadları zaman keçdikcə daha da iriləşiblər. İqlim nə qədər tez dəyişibsə, sürünənlər də bir o qədər sürətlə dəyişiblər. Eyni zamanda kiçik növlər əvvəlcədən iri olan növlərdən daha sürətli böyüyüblər.

Alimlər hesab edirlər ki, 175 il ərzində iri varanların çəkisi 70 kiloqramdan 250 kiloqrama qədər artacaq, beş kiloqramlıq iquanalar isə iri itlər ölçüsünə çataraq 50 kiloqram çəkiyə qədər böyüyəcək.