3.2 milyon il əvvəl yaşamış Lusi hansı xüsusiyyətlərə malik idi?

Yeni tədqiqat 3,2 milyon il əvvəl yaşamış, Lusi adı ilə tanınan “Australopithecus afarensis” növünün qaçış qabiliyyətlərinə işıq salıb.

Alimlər Lusinin skelet strukturu əsasında 3D rəqəmsal model hazırlayıb və müasir meymunların əzələ kütləsi ilə müqayisə ediblər.

Tədqiqat göstərib ki, Lusinin maksimal qaçış sürəti saatda təxminən 18 km olub. Müqayisə üçün bildirək ki, müasir insanın orta sprint sürəti saatda 22 km-dir.

Tədqiqat zamanı müəyyən olunub ki, Lusinin uzun qolları, qısa ayaqları və güclü yuxarı bədən quruluşu onun qaçış qabiliyyətini məhdudlaşdıran amillərdir.

Müasir insanların uzun və yay kimi elastik axillov vətəri qaçış zamanı enerjini effektiv şəkildə paylaya bilir, lakin Lusidə bu xüsusiyyət mövcud olmayıb.

Modeldə Lusinin axillov vətəri müasir insanlara bənzər şəkildə tənzimləndikdə onun qaçış qabiliyyəti yaxşılaşıb, lakin kiçik bədən ölçüsü və skelet quruluşu səbəbindən yenə də müasir insanlardan geri qalıb.

Tədqiqatın nəticələrini müsbət qiymətləndirən antropoloqlar bu istiqamətdə araşdırmaların davam etdiriləcəyini bildiriblər.