4 illik müqavilə imzalanarsa... | İşçilərin şirkət qarşısında tələbi nə idi?

“Boeing” korporasiyasının tətil edən əməkdaşlarının yarıdan çoxu təyyarə istehsalçısı ilə yeni əməkhaqqı müqaviləsini qəbul edib.

“Reuters” agentliyi xəbər verir ki, bu addım yeddi həftə davam edən və istehsalın dayandırılmasına səbəb olan tətilə son qoyub.

Yeni saziş korporasiya işçilərinin maaşlarının növbəti dörd il ərzində 38 faiz artırılmasını nəzərdə tutur. Tətildə iştirak edən əməkdaşlar noyabrın 12-dən öz işlərinə qayıtmalıdırlar.

Amma təyyarə istehsalının tam bərpası və “Boeing” korporasiyasının maliyyə böhranından çıxması uzun çəkə bilər.

Agentliyin məlumatına görə, yeni dördillik müqavilənin sonunda “Boeing” işçilərinin orta illik əməkhaqqı 75,6 min dollardan 119,3 min dollara qalxacaq.

Bundan öncə tətil iştirakçıları əməkhaqqının artırılması ilə bağlı korporasiyanın irəli sürdüyü iki təklifi rədd etmişdi. İşçilərin ilkin tələbi üç il ərzində maaşların 40 faiz artırılmasıdır.

ABŞ Prezidenti Cozef Bayden “Boeing” əməkdaşlarının maraqlarını təmsil edən Beynəlxalq Maşinistlər və Aerokosmik İşçilər Assosiasiyasını və kompaniyanı konsensusa nail olduqlarına görə təbrik edib.