4 ölkənin XİN rəhbəri təcili Gürcüstana səfər etdi | Məqsəd açıqlandı

Latviya, Litva, Estoniya və İslandiyanın xarici işlər nazirləri Gürcüstana səfər ediblər.

Bu barədə Estoniyanın xarici işlər naziri Marqus Tsaxna öz sosial şəbəkə hesabında bildirib.

“Biz Gürcüstana endik. Çətin dövrlərdə siz öz dostlarınıza etibar edə bilərsiniz”, – deyə diplomat qeyd edib.

Eyni tərz paylaşım Litvanın xarici işlər naziri Qabrielius Landsberqisdən də gəlib. O da sosial şəbəkə hesabında foto paylaşaraq Tbilisiyə eniş etdiklərini vurğulayıb.

“Demokratiya, azadlıq və Avropanın gələcəyi uğrunda daha bir döyüşün baş verdiyi Tbilisiyə endim”, – deyə diplomat qeyd edib.

Məlumat üçün bildirək ki, mayın 14-də ölkə parlamentində keçirilən plenar iclasda “Xarici təsirin şəffaflığı haqqında” Qanun layihəsi üçüncü oxunuşda qəbul edilib. Sənədin lehinə 84, əleyhinə 30 deputat səs verib. Bu da ölkədə günlərlə davam edən aksiyanı yenidən alovlandırıb. Paytaxtın küçə və prospektlərində barrikadalar qurulub. Nəqliyyatın hərəkəti tamamilə iflic olub.