8 gündür davam edən İran-İsrail savaşında görün nələr baş verib

İyunun 13-ü gecə saatlarında İsrailin raket zərbələri ilə İranı hədəf alması qarşılıqlı hücumlarla müşayiət olunan müharibəyə səbəb olub.

Hücumların ilk günündə İsrail Hərbi Hava Qüvvələrinə məxsus 200-ə yaxın təyyarə ümumilikdə 100-ə yaxın hədəfə 330 sursat atıb. İranın Natanzdakı nüvə obyekti də daxil olmaqla altı şəhərə avizərbələr endirilib. İran Silahlı Qüvvələrinin Baş Qərargah rəisi və İnqilab Keşikçiləri Korpusunun yüksəkrütbəli liderləri də daxil olmaqla azı 20 komandir, 6 nüvə alimi öldürülüb. İran isə İsrailə 100-ə yaxın pilotsuz uçuş aparatı ilə hücum edib.

Hücumlar iyunun 14-ü də davam edib. İsrailin məlumatına görə, üç nəfər ölüb, 50-dən çox adam yaralanıb. Şərqi Azərbaycan vilayətində 10-a yaxın məntəqəyə də zərbə endirildiyi bildirilib. Tehranda 14 mərtəbəli yaşayış binasının uçması nəticəsində 60 nəfər ölüb.

Münaqişənin 3-cü günündə İran İsrailə iki raket və dronlarla hücum edib. İsrailin Hayfa şəhəri vurulub. Ən azı 15 nəfər yaralanıb. İsrail neft emalı zavodları və hökumət binalarını da hədəf alıb.

İyunun 16-da İran Təl-Əviv və Hayfaya raket zərbələri endirib, 8 nəfər ölüb, 100-dən çox insan yaralanıb, eyni zamanda evlər dağılıb və ABŞ səfirliyinə ziyan dəyib. İsrail Ordusu isə İran üzərində hava üstünlüyünə nail olduğunu bəyan edib. İranda onlarla təxribatçı və İsraillə əlaqəsi olan “casus” həbs edilib.

Münaqişənin 5-ci günündə İranın Hərbi Qərargah rəisi Əli Şadmaninin öldürüldüyü bildirilib. İsrail İranın hərbi obyektlərinə, silah anbarlarına, raket buraxılış qurğularına zərbələr endirib. İrana 30 raket atılıb. İranın isə atdığı raketlərdən biri Herzilya şəhərindəki İsrail Kəşfiyyatının binasına düşüb.

İyunun 18-i İsrail Ordusu Tehranı, İsfahanı, yaxınlıqdakı şəhərləri hədəf alaraq hücumlara məruz qoyub. İsrail İranda onlarla obyekti, o cümlədən Natanzı və Ərak adlanan ağır su nüvə reaktorunu vurub. İran tərəfindən atılan mərmi İsrail əsgərlərinin göndərildiyi əsas xəstəxanalardan biri olan “Soroka”ya düşüb və onlarla insan yaralanıb.