ABŞ-dən Qəşm adasına zərbə | Körfəzdə raket və dron hücumları davam edir - Baku TV

ABŞ Ordusu İran tərəfindən buraxılan raket və PUA-ları ələ keçirdikdən sonra Qəşm adasında yerüstü idarəetmə mərkəzinə zərbələr endirib.

Bu barədə ABŞ Mərkəzi Komandanlığı məlumat yayıb.

“ABŞ Ordusu iyunun 2-də Yaxın Şərqdə İranın hücumlarına cavab olaraq özünümüdafiə məqsədilə bir neçə ballistik raketi, eləcə də dronları uğurla vurub”, – deyə bəyanatda bildirilib.

Komandanlıq vurğulayıb ki, İran beş raket atıb və heç biri hədəflərə dəyməyib, ABŞ Ordusu da üç dronu vurub. ABŞ Ordusu həmçinin Qəşm adasında yerüstü idarəetmə mərkəzinə zərbələr endirib.

İslam İnqilabı Keşikçiləri Korpusu isə Bəhreyndə ABŞ Hərbi Dəniz Qüvvələrinin Beşinci Donanmasının qərargahına, eləcə də regional ölkədəki Amerika hava bazasına raket və pilotsuz uçuş aparatları ilə hücumlar həyata keçirib. Qeyd olunub ki, korpus Hörmüz boğazı yaxınlığında İran neft tankerinə endirilən zərbəyə cavab olaraq ABŞ-yə bağlı gəmiyə hücum edib.

Öz növbəsində ABŞ Mərkəzi Komandanlığı Küveytdəki Amerika qüvvələrinə qarşı İranın PUA hücumunu dəf etdiyini açıqayıb. “Küveytdəki ABŞ qüvvələrinə hücum etməyə çalışan İran dronlarının daha bir dalğası nəzərdə tutulan hədəflərə çata bilməyib. Mərkəzi Komandanlığın hava hücumundan müdafiə qüvvələri bir neçə dronu uğurla vurub”, – deyə qurum “X” hesabında paylaşım edib.

Qeyd olunub ki, Amerika hərbçilərindən heç biri xəsarət almayıb.