ABŞ-İran gərginliyini daha da qızışdıracaq xəbər

İran ABŞ-nin daha əvvəl zərbələr endirdiyi çoxsaylı yeraltı ballistik raket anbarlarına çıxışı yenidən bərpa edə bilib.

Bu barədə "The New York Times" nəşri mənbəyə istinadən məlumat yayıb.

Nəşrin yazdığına görə, İranın çoxsaylı ballistik raketləri qranit qayalarda yaradılan dərin yeraltı tunellərdə və anbarlarda yerləşdirilib. ABŞ aviasiyası bu obyektlərin özünü tamamilə məhv etməkdə çətinlik çəkdiyi üçün əsasən yeraltı keçidlərə zərbələr endirib, onları dağıdaraq bağlayıb.

Mənbənin sözlərinə görə, İran həmin keçidlərin əhəmiyyətli hissəsini artıq yenidən qazaraq istifadəyə açıb. Bildirilir ki, Tehran bir aylıq atəşkəs müddətindən hərbi obyektlərə çıxışın bərpası, mobil raket qurğularının yerinin dəyişdirilməsi və taktikanın yenilənməsi üçün istifadə edib.

Pentaqonun qiymətləndirməsinə görə, ABŞ zərbələri nəticəsində 13 min hədəf vurulub, İran Hərbi Dəniz Qüvvələri ciddi zərər görüb, həmçinin silahlı qüvvələr və kəşfiyyat orqanlarının bir sıra yüksəkvəzifəli nümayəndələri məhv edilib.

Bununla belə, mənbə bildirib ki, İran regiona və qlobal iqtisadiyyata ciddi zərər vurmaq imkanını qoruyub saxladığını nümayiş etdirib.