ABŞ İrana yenidən zərbələr endirəcək

ABŞ-nin hərbi naziri Pit Heqset İrana qarşı güclü zərbələr endiriləcəyini açıqlayıb.

Bu barədə Pentaqon rəhbəri Floridada danışıb. "Zərbələr güclü və dəqiq olacaq", – deyə o bildirib.

Pit Heqset əlavə edib ki, ABŞ kəşfiyyat məlumatları da daxil olmaqla, atəşkəsdən səmərəli istifadə edir.

Öz növbəsində "Tasnim" xəbər agentliyi bildirib ki, İranın Silahlı Qüvvələri tam döyüş hazırlığı vəziyyətindədir və ABŞ-nin hücumu halında cavab zərbələri endirmək niyyətindədir.

Bu arada, ABŞ Prezidenti Donald Tramp "X" sosial şəbəkəsində yazıb ki, ABŞ-nin səyləri sayəsində 200-dən çox kommersiya gəmisi Hörmüz boğazından rahat keçə bilib.

"Ötən ay mən ABŞ Silahlı Qüvvələrinə neft tankerləri və digər kommersiya gəmilərinin Hörmüz boğazından müşayiət olunması üzrə məxfi missiyanı yerinə yetirməyi tapşırdım. Bu gün məmnuniyyətlə elan edirəm ki, bu səylər sayəsində 100 milyondan çox barel neft boğazdan keçərək açıq bazara daxil olub", – deyə bəyanatda bildirilib.

Onun sözlərinə görə, bu uğurlu nəticə Hörmüz boğazına İranın deyil, ABŞ-nin nəzarət etməsi sayəsində əldə olunub. "Onların ordusu darmadağın edilib, iqtisadiyyatları isə məhv olub. İran üçün hər şey bitib", – deyə D.Tramp əlavə edib.