ABŞ İrandakı hərbi hədəflərə yeni zərbələr endirib

ABŞ İordaniya və İraqda amerikalı hərbçilərin həlak olmasından sonra İranla yenidən genişmiqyaslı müharibəyə başlamaq həddinə çatıb.

Bu barədə "The Washington Post" mənbələrə istinadən yazıb.

Ağ Evdə aparılan müzakirələrdə iştirak edən ABŞ rəsmilərindən birinin sözlərinə görə, Vaşinqton İrana qarşı hərbi əməliyyatların genişləndirilməsi imkanını nəzərdən keçirir.

Nəşr qeyd edir ki, Pentaqon Yaxın Şərqdə döyüş aviasiyasının sayını artırır. Bununla yanaşı, hava hücumundan müdafiə vasitələrinin və uzaqmənzilli sursat ehtiyatlarının azalması, həmçinin döyüş itkiləri səbəbindən əlavə qoşun və aviasiyanın bölgəyə göndərilməsi imkanlarının məhdudlaşması əməliyyatların daha da genişləndirilməsini çətinləşdirə bilər.

Bundan başqa, ABŞ Mərkəzi Komandanlığının yaydığı açıqlamada ABŞ hərbi qüvvələrinin İrandakı hədəflərə qarşı yeni zərbələr endirdiyi bildirilib.

"Mərkəzi Komandanlıq ardıcıl 9-cu axşam İrana qarşı zərbələr endirib. Komandanlığın açıqlamasına görə, zərbələr nəticəsində idarəetmə mərkəzləri, sahil müşahidə obyektləri, hava hücumundan müdafiə vasitələri, hərbi dəniz qüvvələrinin obyektləri, raket və dronların yerləşdiyi məntəqələr hədəfə alınıb", – deyə məlumatda bildirilir.