ABŞ müharibəyə 40 milyarddan çox xərc çəkib

İslam İnqilabı Keşikçiləri Korpusunun (SEPAH) Kəşfiyyat İdarəsinin rəisi Məcid Xademi öldürülüb.

Bu barədə "Tasnim" SEPAH-ın mətbuat xidmətinə istinadən xəbər yayıb. Hadisə ilə bağlı əlavə məlumat verilməyib.

General Xademi 2025-ci ilin iyununda Kəşfiyyat İdarəsinin rəisi təyin edilmişdi.

Qeyd edək ki, əvvəlki rəhbər Məhəmməd Kazemi İsrailin 2025-ci ilin iyununda İrana endirdiyi zərbələr nəticəsində həlak olub.

ABŞ-nin İrana qarşı həyata keçirdiyi əməliyyatın dəyəri isə artıq 42 milyard dolları keçib. "Iran War Cost Tracker" portalı məlumat yayıb ki, 2 aya yaxınlaşan müharibə dövründə ABŞ-nin İslam Respublikasına qarşı hərbi əməliyyatlara çəkdiyi qeyri-rəsmi xərclər real vaxt rejimində yenilənir.

Hesablamalar Pentaqonun Konqresə təqdim etdiyi hesabat əsasında aparılıb. Həmin hesabatda bildirilir ki, kampaniyanın ilk 6 günü 11,3 milyard dollara başa gəlib, sonrakı dövrdə isə gündəlik xərclər təxminən 1 milyard dollar təşkil edir.

Bununla belə, portal qeyd edir ki, bəzi analitiklərin fikrincə, sayğacda göstərilən məbləğ əhəmiyyətli dərəcədə az göstərilmiş ola bilər.