ABŞ-nin müttəfiqləri nədən narazıdır? - Baku TV

Səudiyyə Ərəbistanı, Birləşmiş Ərəb Əmirlikləri, Qətər, Küveyt və Bəhreyn daxil olmaqla ABŞ-nin Fars körfəzindəki müttəfiqləri Prezident Donald Trampın İranla sülhə nail olmaq istiqamətindəki siyasətindən getdikcə daha çox narazılıq ifadə edirlər.

Bu barədə “The Washington Post” qəzeti ərəb və Qərb rəsmilərinə istinadən yazıb.

Qeyd olunur ki, bəzi Körfəz ölkələri ərazilərində böyük ABŞ hərbi bazalarının saxlanılmasının nə dərəcədə məqsədəuyğun olduğunu artıq şübhə altına almağa başlayıb.

“Bu müharibəni Tramp başladı, amma bunun əvəzini biz ödəyirik”, – deyə Fars körfəzi ölkələrindən birinin nümayəndəsi bildirib.

Onun sözlərinə görə, Vaşinqtonun siyasətindən narazılıq İranla müharibənin başlanmasından bəri ən yüksək həddə çatıb.

Yüksəkvəzifəli avropalı rəsmi isə Səudiyyə Ərəbistanı, Türkiyə və Pakistan arasında imzalanan birgə müdafiə sazişini də xatırladıb. Onun fikrincə, bu razılaşma ABŞ-yə göndərilən “siqnaldır”.

Rəsmi bildirib ki, üç nüfuzlu sünni ölkə təhlükəsizlik və müdafiə sahəsində tərəfdaşlıqlarını şaxələndirməyə çalışır.

Onun sözlərinə görə, bu ölkələr hesab edirlər ki, yalnız ABŞ kifayət deyil. Bununla belə, Fars körfəzi ölkələri təhlükəsizlik sahəsində əsas tərəfdaş və böyük silah təchizatçısı kimi ABŞ-yə güvənməkdə davam edir.

Ağ Ev isə Trampın Fars körfəzindəki bütün tərəfdaşlarla “müstəsna münasibətlərə” malik olduğunu bəyan edib. Bildirilib ki, ABŞ “Epik qəzəb” əməliyyatından əvvəlki dövrdən etibarən regiondakı bütün müttəfiqləri ilə müntəzəm əlaqə saxlayır.

Ağ Evdən əlavə edilib ki, İran indiyədək olduğundan daha böyük təcrid vəziyyətindədir.

Qeyd edək ki, hazırda ABŞ-nin Qətər və Bəhreyndə hərbi bazaları fəaliyyət göstərir.