ABŞ Prezidenti ukraynalı həmkarı ilə danışıqları uğurlu adlandırdı

ABŞ Prezidenti Donald Tramp tərəflərin Ukraynada nizamlanmaya yaxınlaşdığına əminliyini ifadə edib.

O bu fikirləri ukraynalı həmkarı Volodimir Zelenski ilə birgə mətbuat konfransı zamanı deyib.

Zelenski ilə görüşdən sonra Donald Tramp Ukraynadakı münaqişənin həllində əhəmiyyətli irəliləyiş əldə edildiyini bildirib.

“Ukrayna üçün təhlükəsizlik zəmanətləri ilə bağlı, demək olar ki, ortaq bir anlayışa gəlmişik. Donbas məsələsi həll edilməyib. Bu, çox çətin məsələdir, amma biz onun da həllinə yaxınıq. Ukrayna üçün indi razılaşmaq yaxşıdır, sonra daha çox ərazi itirəcəklər. Ukrayna ərazi məsələlərini ya referendum yolu ilə həll etməli və ya parlamentdə təsdiqləməli olacaq, lakin əhali açıq şəkildə döyüşlərin dayandırılmasını dəstəkləyir. Yaxın həftələrdə biz yekun anlaşma üçün bir araya gələcəyik”, – deyə ABŞ lideri qeyd edib.

Zelenski isə öz növbəsində qeyd edib ki, 20 maddəlik sülh planı 90%, təhlükəsizlik zəmanətləri isə 100% razılaşdırılıb.

“Bizim mövqeyimizi bilirsiniz. Biz konstitusiyaya və ölkənin bütövlüyünə hörmət etməliyik. Trampın dediyi kimi, bu, mürəkkəb bir məsələdir. Rusiya ilə fərqli fikirlərimiz var. Referendumdan danışarkən, bu, əsas məqamlardan biridir. Referendum ola bilər və ya olmaya da bilər”, – deyə Zelenski vurğulayıb.