ABŞ silah ehtiyatlarının bərpası üçün volfram axtarışına çıxıb | "NBC News"

ABŞ İranla müharibə zamanı sərf olunan silah ehtiyatlarını bərpa etmək üçün volfram tədarükü mənbələrini təcili şəkildə axtarır.

Bu barədə "NBC News" məlumat yayıb.

Məlumata görə, volfram qırıcı təyyarələrin, bunker əleyhinə bombaların, zirehdələn mərmilərin və raket sistemlərinin istehsalında istifadə olunur.

Telekanal qeyd edir ki, 2015-ci ildən etibarən ABŞ ərazisində bu metalın hasil edildiyi fəaliyyət göstərən heç bir mədən yoxdur. Volframın həm hasilatı, həm də emalı üzrə əsas lider isə Çindir. Hazırkı vəziyyətdə Vaşinqton Cənubi Koreyada volfram hasilatını yenidən qurmağa çalışır.

Bildirilir ki, ABŞ-nin “Almonty Industries” şirkəti ölkənin şərqində yerləşən mədənlərdən birinin fəaliyyətini 30 illik fasilədən sonra bərpa edib.

Şirkətin rəhbəri Lyuis Blek telekanala açıqlamasında bildirib ki, əvvəllər əsasən hərbi-sənaye kompleksində istifadə olunan volfram son illərdə texnologiya sektorunda da böyük tələbat qazanıb.