ABŞ şirkətləri Yaxın Şərqlə bağlı peyk görüntülərinə çıxışı məhdudlaşdırdı

ABŞ-ın "Planet Labs" və "Vantor" kimi qlobal peyk texnologiyaları nəhəngləri Yaxın Şərqdə davam edən hərbi əməliyyatlarla əlaqədar peyk görüntülərinə çıxış qaydalarını sərtləşdiriblər. Baku.tv-nin məlumatına görə, Kaliforniya mərkəzli "Planet Labs" şirkəti İran, Körfəz ölkələri və digər münaqişə zonaları üzrə yeni çəkilmiş yüksək keyfiyyətli şəkillərin kommersiya müştərilərinə təqdim edilməsinə 14 günlük gecikmə tətbiq edib. Əvvəlcə 4 günlük gecikmə tətbiq edən şirkət, "tərəfdaş və müttəfiq qüvvələrin təhlükəsizliyini təmin etmək" məqsədilə bu müddəti iki həftəyə qədər artırıb. Bu addım rəqib qüvvələrin peyk görüntülərindən taktiki hədəf seçmək və ya zərbələrin nəticələrini real vaxt rejimində qiymətləndirmək üçün istifadə etməsinin qarşısını almağa yönəlib. Qeyd olunur ki, ABŞ ordusu və müttəfiq kəşfiyyat orqanları görüntülərə dərhal çıxış əldə etməkdə davam etsə də, media və müstəqil tədqiqatçılar üçün məlumatlar məhdudlaşdırılıb. Bu qərar müasir müharibələrdə kommersiya kosmik texnologiyalarının hərbi rolu və informasiya blokadası mövzusunu yenidən gündəmə gətirib.