ABŞ və İran arasında sülhün imzalanması mümkündür? - Baku TV

“ABŞ və İran hələlik sülh razılaşmasına çatmayıblar, amma buna çox yaxındırlar”.

Bu barədə ABŞ-nin vitse-prezidenti Cey Di Vens bəyan edib.

Onun sözlərinə görə, nüvə proqramı ilə bağlı bir neçə məsələ hələ də həll edilməyib.

“Hələ ki o mərhələdə deyilik, amma çox yaxınıq. Bunun üzərində işləməyə davam edəcəyik. Prezident Donald Trampın İranla anlaşma memorandumunu nə vaxt imzalayacağını dəqiq demək çətindir. Yüksək dərəcədə zənginləşdirilmiş uran ehtiyatları ilə bağlı bəzi məqamları müzakirə edirik”, – deyə vitse-prezident bildirib.

Vens həmçinin İran tərəfinin razılaşma əldə etmək istədiyinə əminliyini ifadə edib və onların hazırda vicdanla danışıqlar apardığına inandığını qeyd edib.

Bu arada, ABŞ Maliyyə Nazirliyinin yaydığı məlumata əsasən, iki ölkə arasında atəşkəsin qorunması və Hörmüz boğazından gəmilərin daşınmasını təmin etmək barədə ilkin razılaşmalara baxmayaraq, İran neftinin ixracı ilə məşğul olan qurumlara qarşı yeni sanksiyalar paketi tətbiq edilib.