ABŞ və Kanada yoxa çıxan turistləri axtarır
Kanadanın cənub-şərq sahillərində turistləri "Titanik" gəmisinin qalıqlarına baxmağa aparan sualtı qayıqla əlaqə kəsilib.
ABŞ və Kanadaya məxsus gəmi və təyyarələr sualtı qayığı tapmaq üçün səfərbər edilib. ABŞ Sahil Mühafizə Xidməti sualtı qayığın göyərtəsində bir kapitan və dörd sərnişinin olduğunu, gəminin 96 saat su altında qalma qabiliyyətinə malik olduğunu bildirib. Gəminin hələ də suyun altında qalıb-qalmadığı isə məlum deyil.
ABŞ Sahil Mühafizəsi Xidmətinin kontr-admiralı Con Mauqer bildirib ki, ABŞ və Kanada müxtəlif qurğulardan istifadə edərək gəminin axtarışlarını davam etdirir.
Sualtı qayığı idarə edən "OceanGate Expeditions" adlı özəl şirkət insanları xilas etmək üçün "bütün variantların səfərbər edildiyini" açıqlayıb. Məlumata görə, itkin düşənlər arasında Ceff Bezosun “Blue Origin” raketi ilə kosmosa uçan britaniyalı milyarder və tədqiqatçı Hamiş Hardinq də var. Onun qayığın göyərtəsində olması ailəsi tərəfindən təsdiqlənib.
Şirkətin saytında verilən məlumata görə, adambaşına 250 min dollara başa gələn ekspedisiyalar Newfoundland ştatının Sent-John şəhərində başlayır və səyahət müddətində 640 kilometr məsafə qət edilir. "Titanik"in dağıntıları arasından dalış və çıxmaq təxminən 8 saat çəkir.
![icon](/images/loading.png)