ABŞ və Ukrayna arasında danışıqların ilk sessiyası sona çatdı

"Hörmətli Amerika nümayəndə heyəti ilə ilk görüşümüz çox məhsuldar oldu. Çox yaxşı irəliləyiş əldə etdik, ədalətli və davamlı sülhə doğru irəliləyirik".

Bunu Cenevrədə Amerika nümayəndə heyəti ilə danışıqların ilk sessiyasından sonra Ukrayna Prezidenti Ofisinin rəhbəri Andrey Yermak jurnalistlərə açıqlamasında bildirib.

Onun sözlərinə görə, danışıqların ilk sessiyası başa çatıb.

A.Yermak sülhə sadiq olduqları üçün ABŞ-yə, xüsusən Prezident Donald Trampa və onun komandasına təşəkkür edib.

O əlavə edib ki, ikinci görüş keçiriləcək və Ukrayna tərəfi Avropa tərəfdaşlarının iştirakı ilə birgə təkliflər üzərində işləməyə davam edəcək. Son qərarlar iki ölkənin prezidentləri tərəfindən veriləcək.

ABŞ dövlət katibi Marko Rubio isə danışıqlardan sonra Birləşmiş Ştatların sülh planında dəyişikliklər etdiyini açıqlayıb. Dövlət katibi bildirib ki, bütün maraqlı tərəflərin fikirlərinə əsaslanan, yaxşı məhsul var və bu məqamların bəziləri maddə-maddə həll edə biliblər.

"Düşünürəm ki, yaxşı irəliləyiş əldə etmişik", ‒ deyə M.Rubio qeyd edib.

O, ABŞ və Ukrayna komandalarının artıq öz otaqlarına çəkildiyini, Amerika tərəfinin qarşıya qoyulmuş bəzi təkliflər üzərində işlədiyini açıqlayıb.