Adı arzuolunmaz siyahıya düşən müğənni | Peskov məsələyə aydınlıq gətirdi

Azərbaycanəsilli məşhur qazax reper Jah Xalib Rusiyada çıxışı qadağan edilən sənətçilərin qeyri-rəsmi siyahısına daxil edilib.

Bu barədə Rusiyanın “Вёрстка” nəşri məlumat yayıb.

Bildirilib ki, bu addım Rusiya və Ukrayna arasındakı müharibə fonunda atılıb.

Nəşrə görə, 79 məşhurun adının daxil olduğu siyahı reklam və tədbir agentliklərinə göndərilib. Qadağan edilən sənətçilərin siyahısının məsləhət xarakterli olduğu vurğulanıb.

Bu qara siyahıya düşən sənətçilər arasında 31 yaşlı Jah Xalib də yer alıb. Siyahıda Skriptonit, Anna Sedokova, İvan Urqant, İnstasamka, Qaf və digərlərinin adı var.

Maraqlı məqamlardan biri də “qara siyahı”ya dünya ulduzlarının adının da daxil edilməsidir: Beyonse, Lana Del Rey, Hozier, həmçinin “Metallica”, “Florence and the Machine” qrupları.

Kremlin rəsmi sözçüsü Dmitri Peskov məsələ ilə bağlı açıqlamasında “Biz siyahı haqqında heç nə bilmirik. Ortalıqda çoxlu saxta siyahılar var” deyib.

Onun sözlərinə görə, Rusiya və Ukrayna arasındakı vəziyyətlə bağlı tədbirin təşkilatçıları bu cür addımlar ata bilərlər, lakin Kremlin bununla heç bir əlaqəsi yoxdur.

Qeyd edək ki, J.Xalibin həyat yoldaşı İslamı qəbul etmiş ukraynalıdır.