Aİ rəsmisindən xəbərdarlıq | Qəzza zolağında dəhşətli vəziyyət

“Hazırda Qəzza zolağında humanitar vəziyyət o qədər acınacaqlıdır ki, oradakı humanitar qanunlar sözün əsl mənasında xarabalıqlar altında basdırılıb”.

Bunu Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Cozef Borel Lüksemburqda keçirilən Aİ xarici işlər nazirlərinin görüşündən sonra mətbuat konfransında deyib.

“Biz Qəzzada humanitar vəziyyəti unutmamalıyıq. Ora gələn yardımın miqdarı müharibə başlayandan bəri ən aşağı səviyyədədir. ABŞ prezidentliyinə namizəd Kamala Harris bildirib ki, son 2 həftə ərzində Qəzzaya heç bir ərzaq çatmayıb. Ehtiyaclar sürətlə artır. 40 mindən çox insan həlak olub və qorxuram ki, humanitar hüquq da bu müharibənin qurbanı olsun”, – deyə C.Borel bildirib.

Avropalı diplomat deyib ki, 400 min yerli sakin bölgədən təxliyə əmri alıb, lakin onların gedəcək yeri yoxdur, buna görə də insanlar sadəcə olaraq tələyə düşüblər və bombardmana məruz qalma riski var.