"Aİ vəsaitləri tezliklə Macarıstana daxil olmağa başlayacaq" | Peter Madyar

Macarıstanın yeni seçilmiş Baş naziri Peter Madyar Avropa Komissiyasının rəhbəri Ursula fon der Leyenlə görüş keçirib.

Madyar bu barədə "X" sosial şəbəkəsindəki hesabında yazıb.

"Avropa Komissiyasının rəhbəri ilə çox konstruktiv və məhsuldar görüşüm oldu. Biz razılığa gəldik ki, Macarıstan və macar xalqının ən qısa zamanda bir neçə milyard forint məbləğində Aİ vəsaitini ala bilməsi üçün zəruri olan siyasi razılaşmanı bağlamaq məqsədilə Macarıstanın Baş naziri kimi mən 25 mayda Brüsselə qayıdacağam", – deyə o yazıb.

Madyar bildirib ki, Avropa İttifaqı Macarıstanın milli maraqlarına zidd ola biləcək heç bir şərt irəli sürmür.

"Aİ vəsaitləri tezliklə Macarıstana daxil olmağa başlayacaq, bu da bizə Macarıstan iqtisadiyyatına təkan verməyə və işlək, eləcə də humanist bir ölkə üçün bütün zəruri olan hər şeyi təmin etməyə imkan verəcək", – deyə o əlavə edib.

Qeyd edək ki, Macarıstan 17 milyard avroya qədər vəsaitin blokdan çıxarılması ilə bağlı Avropa Komissiyası ilə aktiv danışıqlar aparır, bu vəsaitlərin ayrılması üçün Brüssel Budapeştdən təcili olaraq bir sıra sahələrdə, xüsusən də hüquq sistemində islahatların aparılmasını tələb edir.