Aktyor Jerar Depardye döydüyü italiyalı fotoqrafla barışıb

“Paparatsilərin kralı” kimi tanınan italiyalı fotoqraf Rino Barillari ilə fransız aktyor Jerar Depardye aralarındakı məhkəmə çəkişməsinə son qoyaraq qarşılıqlı iddialardan imtina ediblər.

Bu barədə ANSA agentliyi xəbər yayıb.

Bildirilib ki, tərəflər Romada Veneto küçəsində yerləşən restoranda görüşüb və barışıqlarını qucaqlaşaraq təsdiqləyiblər.

Məlumata əsasən, məhz həmin restoranda 2024-cü ilin mayında Barillari ilə Jerar Depardye arasında dava baş verib. Hadisədən sonra tərəflər polisə müraciət edib, aktyorun İtaliyada fotoqrafı döyməsi ilə bağlı məhkəmə prosesi gözlənilirdi.

Eyni zamanda Depardyeyə qarşı onun yol yoldaşı Maqda Vavrusova da iddia qaldırmışdı. O, paparatsinin aktyoru və özünü razılıqları olmadan lentə aldığını bildirmişdi.

ANSA Barillarinin sözlərini sitat gətirir: “Biz barışdıq, 1960-cı illərin uşaqları kimi qucaqlaşdıq. O, üzr istədiyi üçün mən şikayətimi geri götürdüm”.

Depardyenin vəkili də bütün mübahisəli məsələlərin tam həll edildiyini təsdiqləyib.