Alimlərdən xəbərdarlıq | 53 mindən çox uşaqla aparılan test nələri ortaya çıxardı?

Okayama Universitetinin yapon alimləri aşkar ediblər ki, açıq havada gəzintilər kiçik uşaqları piylənmədən qoruya bilər.

Tədqiqat “Acta Pediatrica” elmi jurnalında dərc olunub.

Mütəxəssislər 2001-ci ilin yanvar və iyul aylarında doğulan uşaqların məlumatlarını öyrəniblər. Nümunəyə 53 575 nəfər daxil olub. Onlardan 42 812-si 2,5 yaşına qədər müntəzəm olaraq çöldə oynayıb.

Sonrakı sorğularda elm adamları yeddi yaşında olan nümunədən 31 743 uşağın boyu və çəkisi haqqında məlumat əldə ediblər. Məlum olub ki, tədqiqat iştirakçılarının yalnız 10%-də artıq çəki və ya piylənmə əlamətləri var.

Açıq havada oyun təcrübəsi olmayan uşaqlarla müqayisədə açıq havada daha çox vaxt keçirən həmyaşıdlarının artıq çəki alma ehtimalı 15% az olub.

Yaponiyalı alim Takahiro Tsuge valideynlərə və tərbiyəçilərə uşaqlarını erkən yaşlarından açıq havada oyun oynamağa təşviq etməyi məsləhət görüb. Çünki bu, gələcəkdə piylənmənin qarşısını almağa kömək edir.