Allergiyanın simptomları və testləri | “İlboyu da davam edə bilər”

"Burun allergiyası bədənin immun reaksiyası nəticəsində inkişaf edən və uzunmüddətli burun tutulmasına səbəb olan ən yayılmış amillərdən biridir".

Bu barədə rusiyalı həkim Aleksandra Filyova yerli mediaya müsahibəsində bildirib.

Onun sözlərinə görə, burun allergiyası zamanı immun hüceyrələri əksər insanlar üçün zərərsiz olan maddələri bədən üçün təhlükəli hesab edərək onlara hücum edirlər.

"Nəticədə iltihab inkişaf edir. Bu proses həm mövsümi, həm də ilboyu davam edə bilər", – deyə həkim izah edib.

Mütəxəssis qeyd edib ki, burun allergiyasının simptomları olduqca spesifikdir: bunlara burun tutulması, şəffaf axıntı, asqırma, burunda qaşınma və gözlərin sulanması daxildir. Lakin reaksiyaya səbəb olan konkret amili müəyyən etmək üçün həkim nəzarəti altında bir sıra testlər keçirilməlidir.

"Əgər burun axıntısı allergiyadan qaynaqlanırsa, ilk növbədə allergenlə təmasdan çəkinmək lazımdır. Məsələn, reaksiyaya səbəb olan qidaları rasiondan çıxarmaq, neytral təmizlik və kosmetik vasitələrə keçmək və ya yataq otağındakı dibçək güllərini kənarlaşdırmaq tövsiyə olunur. Allergiyanın mənşəyi məlum deyilsə, dəqiq diaqnoz üçün qan və dəri testlərindən keçmək vacibdir", – deyə Aleksandra Filyova vurğulayıb.