Ankaranın məxfi planı üzə çıxdı? - “S-400”lərin aqibəti gündəmə yenidən düşdü - Baku TV

Türkiyə Rusiyadan aldığı “S-400” zenit-raket komplekslərini körfəz ölkələrindən birinə satıb.

Bu iddianı ölkədə fəaliyyət göstərən “Hürriyet” qəzeti irəli sürüb.

Qəzetin yazdığına görə, sövdələşmə iyulun 10-da yekunlaşdırılmalı və rəsmi şəkildə elan olunmalıdır.

Mənbələrin bildirdiyinə əsasən, “S-400” sistemləri ya Birləşmiş Ərəb Əmirliklərinə, ya da Qətərə göndəriləcək.

Məqalədə qeyd olunur ki, ABŞ-nin Türkiyəyə qarşı tətbiq etdiyi CAATSA sanksiyalarının ləğvi ilə bağlı Donald Trampın son açıqlamaları “S-400”lərin taleyi məsələsini yenidən gündəmə gətirib.

Xatırladılır ki, həmin sanksiyalar Ankara Rusiyadan “S-400” sistemlərini aldıqdan sonra tətbiq edilmişdi.

“Hürriyet”in məlumatına görə, uzun müddətdir “S-400” sistemlərinin istifadəyə verilib-verilmədiyi və ya anbarlarda saxlanıldığı barədə dəqiq məlumat olmayıb.

Nəşrin əldə etdiyi məlumata əsasən, komplekslər üçüncü ölkəyə satılıb və son texniki detallar artıq razılaşdırılıb.

Qəzet yazır ki, İran-İsrail qarşıdurmasından sonra Körfəz ölkələri hava hücumundan müdafiə imkanlarını gücləndirmək üçün alternativ sistemlər axtarmağa başlayıblar.

Nəşrin qiymətləndirməsinə görə, Ankara “S-400”ləri satmaqla həm CAATSA sanksiyalarından qurtula, həm də bu satışdan gəlir əldə edə bilər.