Avropa FMLA gizli təyyarəsinin hazırlanmasına başlayır - Baku TV

Avropa İttifaqında "Super Tucano"nun universallığını, eyni zamanda onun azgörünən və iqtisadi cəhətdən səmərəliliyini artırmağa hesablanmış çoxfunksiyalı yüngül turbovintli FMLA təyyarəsinin hazırlanmasına start verilir.

"Future Multirole Light Aircraft" – "Gələcək Çoxfunksiyalı Yüngül Təyyarə" layihəsi Avropa Müdafiə Fondunun 2026-cı il proqramı çərçivəsində 15 milyon avro maliyyə dəstəyi alıb.

Sənədlərə əsasən, yeni təyyarə mövcud turbovintli modelləri təkrarlamamalı, lakin birbaşa atəş dəstəyi, dronların tutulması, kəşfiyyat, zərbələrin koordinasiyası və hədəf göstərilməsi kimi tapşırıqları yerinə yetirməlidir.

Xüsusi diqqət radar görünməzliyini azaldan müasir materiallara və texnologiyalara, radioelektron mübarizəyə davamlılığa, öz radar sistemlərinə və "adaptiv maskalanma" vasitələrinə yönəldilir.

Bununla yanaşı, aparat mürəkkəb iqlim şəraitində effektivliyini qoruyub saxlamalı və ekoloji standartlara cavab verməlidir.

FMLA aşağı intensivlikli münaqişələr, düşmənin Hava Hücumundan Müdafiə sistemlərinin zəiflədildiyi əməliyyatlar üçün nəzərdə tutulur.

Ekspertlərin sözlərinə görə, bu təyyarə müasir döyüş maşınlarını almağa imkanı olmayan ölkələr üçün əlçatan və sərfəli həll olacaq.