Avropa İttifaqında yeni vergi təşəbbüsü irəli sürülüb

Avropa İttifaqında enerji qiymətlərinin artması fonunda yeni vergi təşəbbüsü irəli sürülüb.

Bu barədə "Reuters agentliyi" məlumat yayıb.

Qeyd olunur ki, Almaniya, İtaliya, İspaniya, Portuqaliya və Avstriyanın maliyyə nazirləri Avropa Komissiyasına ünvanladıqları məktubda enerji şirkətlərinin fövqəladə gəlirlərinə vergi tətbiq edilməsinə çağırış ediblər.

Nazirlər bildiriblər ki, bu addım həm birlik nümayişi olacaq, həm də müharibənin nəticələrindən qazanc əldə edənlərin cəmiyyətə töhfə verməsini təmin edəcək.

Qeyd olunub ki, təşəbbüs 2022-ci ildə tətbiq edilən oxşar fövqəladə vergi mexanizminə əsaslana bilər.

Bu arada Macarıstanın Baş naziri Viktor Orban bildirib ki, Avropa iqtisadiyyatı enerji böhranı ilə üz-üzədir.

"Biz vəziyyəti Slovakiyanın Baş naziri Robert Fitso ilə müzakirə etdik, çünki Avropada vəziyyət kritikdir. Ciddi enerji böhranı yaxınlaşır və o, gündən-günə sürətlənir. Avropa iqtisadiyyatı enerji daşıyıcılarının çatışmazlığı və bunun nəticəsi olaraq qiymət artımı ilə üz-üzədir", – deyə Orban bildirib.

Onun fikrincə, təhlükə qaçılmazdır və bunun qarşısını yalnız o halda almaq mümkündür ki, Avropa İttifaqı öz neft və qaz ehtiyatlarını mümkün qədər tez təmin etsin.